भिगवण येथील २१ वर्षीय तरुणीच्या कथित अपहरण प्रकरणाला आज नाट्यमय वळण मिळाले. सुरुवातीला स्वमर्जीने प्रियकरासोबत गेल्याचे सांगणाऱ्या या तरुणीने आज न्यायालयीन सुनावणीदरम्यान आपली भूमिका बदलत आई व मामाकडे जाण्याची इच्छा व्यक्त केली. न्यायालयाने तिची इच्छा मान्य करत तिला कुटुंबाच्या स्वाधीन करण्याची प्रक्रिया सुरू केली आहे. त्यामुळे गेल्या काही दिवसांपासून संपूर्ण परिसरात निर्माण झालेल्या तणावाला आता विराम मिळण्याची शक्यता व्यक्त होत आहे.

या प्रकरणाची व्हिडिओ कॉन्फरन्सिंगद्वारे सुनावणी पार पडली. न्यायालयाने तरुणीची स्वतंत्रपणे बाजू ऐकून घेतली आणि तिची स्पष्ट इच्छा जाणून घेतली. यावेळी तिने आपण आई व मामाकडे जाणार असल्याचे सांगितले. सुरुवातीला प्रियकरासोबत राहण्याचा पवित्रा घेतलेल्या तरुणीच्या या बदललेल्या भूमिकेमुळे प्रकरणाला पूर्णतः वेगळे वळण मिळाले आहे.

काही दिवसांपूर्वी भिगवण बाजारपेठेतून तरुणीचे अपहरण झाल्याची तक्रार तिच्या आई व भावाने दाखल केली होती. आईच्या डोळ्यात मिरची पूड टाकून मुलीला जबरदस्तीने पळवून नेल्याचा आरोप करण्यात आला होता. या घटनेनंतर भिगवण परिसरात संतापाची लाट उसळली होती. शहरात कडकडीत बंद पाळण्यात आला होता तसेच जनआक्रोश मोर्चाही काढण्यात आला होता. त्यानंतर तरुणीचा एक व्हिडिओ समोर आला होता, ज्यामध्ये तिने आपण स्वेच्छेने गेल्याचे म्हटले होते. त्यामुळे तपासात गुंतागुंत निर्माण झाली होती.

या प्रकरणावरून राजकीय वातावरणही तापले होते. आमदार राहुल कुल यांच्यावर विविध स्तरांवर आरोप करण्यात आले होते, तर काही सामाजिक संघटनांनी आक्रमक भूमिका घेत आंदोलन छेडले होते. त्यामुळे हे प्रकरण राज्यभर चर्चेचा विषय ठरले होते.

दरम्यान, पुणे ग्रामीण पोलीस यांनी संयम राखत कायदेशीर प्रक्रियेप्रमाणे तपास केला. तरुणीचा शोध घेऊन तिला न्यायालयासमोर सुरक्षितरित्या हजर करण्यात पोलिसांनी महत्त्वाची भूमिका बजावली. सध्या प्रकरणातील इतर कायदेशीर बाबींची पूर्तता सुरू असून पुढील तपास सुरू आहे. तरुणीच्या घरवापसीच्या निर्णयामुळे कुटुंबीयांसह आंदोलकांनाही मोठा दिलासा मिळाला आहे.

आकाश पवार

divyajyotisamachar.in

The post भिगवण अपहरण प्रकरणाला नाट्यमय कलाटणी; ‘ती’ तरुणी अखेर आई-मामाकडे परतणार! appeared first on DIVYAJYOTI SAMACHAR.

भिगवण:-

इंदापूर तालुक्यातील तक्रारवाडी येथील ग्रामस्थांच्या नशिबी मरणानंतरही अंधारच असल्याचे विदारक चित्र समोर आले आहे. येथील स्मशानभूमीत वीजपुरवठा नसल्याने रात्रीच्या वेळी चक्क मोबाईल टॉर्चच्या उजेडात अंत्यविधी उरकावे लागत आहेत. प्रशासनाच्या या उदासीनतेबद्दल परिसरातून तीव्र संताप व्यक्त होत आहे. पाणीसाठ्याजवळ स्मशानभूमी, पण सोयींचा दुष्काळ पडलेला दिसून येत आहे. तक्रारवाडी हे पुनर्वसित गाव असून गावाची स्मशानभूमी उजनी धरणाच्या पाणीसाठ्याजवळ, गावापासून सुमारे दीड किलोमीटर अंतरावर आहे. ही जागा निर्जन ठिकाणी असल्याने संध्याकाळनंतर येथे पूर्णतः काळोख असतो. गेल्या अनेक वर्षांपासून येथे कायमस्वरूपी वीजपुरवठ्याची मागणी केली जात आहे, मात्र स्थानिक प्रशासनाने याकडे सोयीस्कर दुर्लक्ष केल्याचा आरोप ग्रामस्थ करत आहेत. काही वर्षांपूर्वी येथे सोलर दिवे बसवून मलमपट्टी करण्याचा प्रयत्न झाला होता. मात्र, निकृष्ट दर्जा किंवा देखभालीच्या अभावामुळे हे दिवे अल्पावधीतच बंद पडले. संबंधित ठेकेदाराने याची दुरुस्ती करण्याची तसदीही घेतली नाही. परिणामी, ‘असून अडचण आणि नसून खोळंबा’ अशी स्थिती निर्माण झाली आहे.

प्रशासनाचा ‘टॉर्च’ कधी पेटणार?

नुकत्याच झालेल्या एका अंत्यविधीच्या प्रसंगी राज्याचे कृषिमंत्री दत्तात्रय भरणे आणि गावातील मान्यवर उपस्थित होते. मात्र, स्मशानभूमीत दिवाबत्तीची सोय नसल्याने उपस्थितांना मोबाईलचे टॉर्च लावून अंत्यविधी पार पाडावा लागला. ही बाब अत्यंत दुर्दैवी असून प्रशासनाच्या कारभाराचे वाभाडे काढणारी आहे.

स्मशानभूमीपर्यंत कायमस्वरूपी वीजजोडणी मिळावी. बंद पडलेले सोलर दिवे तातडीने दुरुस्त करावेत किंवा नवीन बसवावेत. स्मशानभूमीकडे जाणारा रस्ता आणि पिण्याच्या पाण्याची सोय करावी. संवेदनशील मानल्या जाणाऱ्या स्मशानभूमीच्या प्रश्नावर प्रशासनाने तातडीने लक्ष देऊन हा ‘अंधार’ दूर करावा, अशी मागणी आता जोर धरू लागली आहे. अन्यथा, येणाऱ्या काळात आक्रमक पवित्रा घेण्याचा इशारा तक्रारवाडीच्या ग्रामस्थांनी दिला आहे.

आकाश पवार

divyajyotisamachar.in

The post तक्रारवाडीत मृत्यूनंतरही मिळेना प्रकाशाचा सोबती; स्मशानभूमी आजही अंधारात! appeared first on DIVYAJYOTI SAMACHAR.

भिगवण–राशीन रोडवरील राजपुरे पेट्रोल पंपाजवळ मंगळवारी (१३ जानेवारी) रात्री उशिरा झालेल्या भीषण अपघातात एका युवकाचा जागीच मृत्यू झाला, तर अन्य दोन जण गंभीर जखमी झाले आहेत. या घटनेमुळे परिसरात हळहळ व्यक्त होत असून ऊस वाहतूक करणाऱ्या वाहनांच्या सुरक्षिततेचा मुद्दा पुन्हा ऐरणीवर आला आहे.

मिळालेल्या माहितीनुसार, सोलापूर जिल्ह्यातील करमाळा तालुक्यातील काञज गावचे रहिवासी अतुल बाबुलाल गजरमल (वय ३८) हे विजय हनुमंत शिंदे (वय ३८) आणि दादासो सर्जेराव डुबे (वय ३५) यांच्यासह स्विफ्ट कार मधून प्रवास करत होते. रात्री सुमारे १०.३० वाजण्याच्या सुमारास भिगवणजवळील राजपुरे पेट्रोल पंपाजवळ त्यांच्या कारची ऊसाने भरलेल्या दोन ट्रॉल्या जोडलेल्या ट्रॅक्टरला जोरदार धडक बसली.

या अपघातात अतुल गजरमल यांचा जागीच मृत्यू झाला. कारमधील इतर दोन प्रवासी गंभीर जखमी झाले असून त्यांच्यावर जवळच्या रुग्णालयात उपचार सुरू आहेत. अपघातानंतर परिसरात काही काळ तणावाचे वातावरण निर्माण झाले होते.

याप्रकरणी राजीव भावसाहेब गजरमल यांनी भिगवण पोलीस ठाण्यात फिर्याद दाखल केली आहे. ट्रॅक्टर चालक चंद्रकांत कोकरे (रा. टाकळी, ता. करमाळा) याच्या ताब्यातील वाहनाशी हा अपघात झाल्याची नोंद करण्यात आली असून भिगवण पोलीस अधिक तपास करत आहेत.

आकाश पवार

divyajyotisamachar.in

The post भिगवण–राशीन रोडवर भीषण अपघात: ट्रॅक्टर–स्विफ्ट धडकेत एकाचा मृत्यू, दोघे गंभीर appeared first on DIVYAJYOTI SAMACHAR.