पुणे, सोलापूर आणि अहिल्यानगर या तीन जिल्ह्यांच्या सीमावर्ती भागातील महत्त्वाचे दळणवळण केंद्र असलेल्या भिगवण (ता. इंदापूर) येथील बसस्थानकाचा प्रश्न आता अत्यंत गंभीर बनला आहे. बसस्थानकाच्या नूतनीकरणाचे काम अत्यंत संथ गतीने सुरू असल्याने प्रवासी, शाळकरी विद्यार्थी, महिला आणि ज्येष्ठ नागरिकांना सध्या ऊन, पाऊस आणि चिखलाचा सामना करावा लागत आहे. प्रशासकीय अनास्थेमुळे येथील प्रवाशांची मोठी ससेहोलपट होत असून नागरिकांमधून आता तीव्र संताप व्यक्त केला जात आहे.

भिगवण येथील नवीन सुसज्ज बसस्थानकासह विविध विकासकामांसाठी २२ कोटी २५ लाख रुपयांचा भव्य निधी मंजूर करण्यात आला आहे. जानेवारी २०२६ मध्ये राज्याचे कृषिमंत्री दत्तात्रय भरणे यांच्या हस्ते या कामाचे भूमिपूजन अत्यंत उत्साहात पार पडले होते. भूमिपूजनानंतर प्रशासनाने जुनी इमारत तातडीने पाडण्याची तत्परता दाखवली, मात्र त्यानंतर नवीन इमारतीचे बांधकाम पूर्णपणे बंद पडले आहे.

भिगवण हे इंदापूर, बारामती, दौंड, करमाळा आणि कर्जत या पाच तालुक्यांतील प्रवाशांसाठी मुख्य केंद्र आहे. येथून दररोज सुमारे ३५० ते ४०० एसटी बसफेऱ्या होत असतात, तर अंदाजे ३ हजार ५०० ते ४ हजार प्रवासी रोज या स्थानकाचा वापर करतात. एवढ्या मोठ्या संख्येने येणाऱ्या प्रवाशांच्या सोयीकडे पूर्णपणे दुर्लक्ष झाले आहे. सध्या पावसाळ्याचे दिवस असल्याने बसस्थानक परिसरात मोठ्या प्रमाणावर चिखल झाला असून पाण्याचे डबके साचले आहेत.

जुनी इमारत पाडल्यानंतरचा दगड-मातीचा ढिगारा अद्यापही तसाच पडून असल्याने प्रवाशांना बसमध्ये चढताना आणि उतरताना मोठी कसरत करावी लागत आहे. प्रशासनाने उभारलेले तात्पुरते शेड प्रवाशांच्या संख्येच्या तुलनेत अत्यंत अपुरे पडत असल्याने बहुतांश नागरिकांना उघड्यावरच थांबावे लागत आहे.

परिसरात शाळा आणि महाविद्यालये असल्याने रोज प्रवास करणाऱ्या विद्यार्थिनींची संख्या मोठी आहे. मात्र, बसस्थानकाची हक्काची इमारत नसल्याने व परिसर ओसाड झाल्याने विद्यार्थिनींच्या सुरक्षेचा गंभीर प्रश्न निर्माण झाला आहे. त्यातच आगामी आषाढी वारीच्या पार्श्वभूमीवर पंढरपूरकडे जाणाऱ्या वारकऱ्यांची मोठी गर्दी या मार्गावर होणार आहे. भिगवण हे वारकऱ्यांचे प्रमुख थांबे असल्याने, बसस्थानकाची ही दुरवस्था पाहता वारीच्या काळात वारकऱ्यांचे प्रचंड हाल होण्याची दाट शक्यता आहे. त्यामुळे परिवहन महामंडळाने तात्पुरती मलमपट्टी न करता युद्धपातळीवर बसस्थानकाचे काम पूर्ण करावे, अशी मागणी आता जोर धरू लागली आहे.

“भूमिपूजन झाले तेव्हा वाटले होते की लवकरच हक्काचे आणि आधुनिक बस स्थानक मिळेल. पण जुनेही गेले आणि नवीनही मिळेना अशी आमची अवस्था झाली आहे. या रखडलेल्या कामामुळे येथील प्रवाशांचे प्रचंड हाल होत आहेत,”

— बॉबी एम. थॉमस , स्थानिक नागरिक

आकाश पवार

divyajyotisamachar.in

The post भिगवण बसस्थानकाचे काम रखडले; कागदावर ‘सुसज्ज’, प्रत्यक्षात प्रवासी उघड्यावर! appeared first on DIVYAJYOTI SAMACHAR.

भिगवण येथील २१ वर्षीय तरुणीच्या कथित अपहरण प्रकरणाला आज नाट्यमय वळण मिळाले. सुरुवातीला स्वमर्जीने प्रियकरासोबत गेल्याचे सांगणाऱ्या या तरुणीने आज न्यायालयीन सुनावणीदरम्यान आपली भूमिका बदलत आई व मामाकडे जाण्याची इच्छा व्यक्त केली. न्यायालयाने तिची इच्छा मान्य करत तिला कुटुंबाच्या स्वाधीन करण्याची प्रक्रिया सुरू केली आहे. त्यामुळे गेल्या काही दिवसांपासून संपूर्ण परिसरात निर्माण झालेल्या तणावाला आता विराम मिळण्याची शक्यता व्यक्त होत आहे.

या प्रकरणाची व्हिडिओ कॉन्फरन्सिंगद्वारे सुनावणी पार पडली. न्यायालयाने तरुणीची स्वतंत्रपणे बाजू ऐकून घेतली आणि तिची स्पष्ट इच्छा जाणून घेतली. यावेळी तिने आपण आई व मामाकडे जाणार असल्याचे सांगितले. सुरुवातीला प्रियकरासोबत राहण्याचा पवित्रा घेतलेल्या तरुणीच्या या बदललेल्या भूमिकेमुळे प्रकरणाला पूर्णतः वेगळे वळण मिळाले आहे.

काही दिवसांपूर्वी भिगवण बाजारपेठेतून तरुणीचे अपहरण झाल्याची तक्रार तिच्या आई व भावाने दाखल केली होती. आईच्या डोळ्यात मिरची पूड टाकून मुलीला जबरदस्तीने पळवून नेल्याचा आरोप करण्यात आला होता. या घटनेनंतर भिगवण परिसरात संतापाची लाट उसळली होती. शहरात कडकडीत बंद पाळण्यात आला होता तसेच जनआक्रोश मोर्चाही काढण्यात आला होता. त्यानंतर तरुणीचा एक व्हिडिओ समोर आला होता, ज्यामध्ये तिने आपण स्वेच्छेने गेल्याचे म्हटले होते. त्यामुळे तपासात गुंतागुंत निर्माण झाली होती.

या प्रकरणावरून राजकीय वातावरणही तापले होते. आमदार राहुल कुल यांच्यावर विविध स्तरांवर आरोप करण्यात आले होते, तर काही सामाजिक संघटनांनी आक्रमक भूमिका घेत आंदोलन छेडले होते. त्यामुळे हे प्रकरण राज्यभर चर्चेचा विषय ठरले होते.

दरम्यान, पुणे ग्रामीण पोलीस यांनी संयम राखत कायदेशीर प्रक्रियेप्रमाणे तपास केला. तरुणीचा शोध घेऊन तिला न्यायालयासमोर सुरक्षितरित्या हजर करण्यात पोलिसांनी महत्त्वाची भूमिका बजावली. सध्या प्रकरणातील इतर कायदेशीर बाबींची पूर्तता सुरू असून पुढील तपास सुरू आहे. तरुणीच्या घरवापसीच्या निर्णयामुळे कुटुंबीयांसह आंदोलकांनाही मोठा दिलासा मिळाला आहे.

आकाश पवार

divyajyotisamachar.in

The post भिगवण अपहरण प्रकरणाला नाट्यमय कलाटणी; ‘ती’ तरुणी अखेर आई-मामाकडे परतणार! appeared first on DIVYAJYOTI SAMACHAR.

भिगवण:

लाचलुचपत प्रतिबंधक विभाग (ACB), पुणे यांच्या वतीने १५ ऑक्टोबर २०२५ रोजी भिगवण येथील अतिथी गृहात (Guest House) भ्रष्टाचाराविरोधात एक महत्त्वपूर्ण जनजागृती कार्यक्रम आयोजित करण्यात आला होता. सकाळी ११.०० वाजता सुरू झालेल्या या माहितीपर कार्यक्रमात, ‘योजना सरकारची, मग लाच कशासाठी?’ या घोषवाक्यासह नागरिकांनी लाचेच्या मागणीबाबत न घाबरता तक्रार करण्याचे आवाहन करण्यात आले.

या वेळी लाचलुचपत प्रतिबंधक विभागाच्या (ACB) अधिकाऱ्यांनी नागरिकांना सविस्तर माहिती दिली. कोणतीही शासकीय कामे पूर्ण करण्यासाठी किंवा सरकारी योजनांचा लाभ घेण्यासाठी लाच देणे अथवा घेणे हा गंभीर गुन्हा असल्याचे त्यांनी स्पष्ट केले. शासकीय सेवा नागरिकांच्या हक्काच्या असून, त्यासाठी लाच मागणाऱ्या लोकसेवकांबद्दल तातडीने तक्रार करण्याचे आवाहन यावेळी करण्यात आले.

भ्रष्टाचारासंबंधी तक्रार नोंदवण्यासाठी लाचलुचपत प्रतिबंधक विभागाने (ACB) नागरिकांना पुढील संपर्क साधने उपलब्ध करून दिली आहेत:

ऑनलाइन तक्रार: acbmaharashtra.net किंवा acbmaharashtra.gov.in

ई-मेल: dyspacbpune@mahapolice.gov.in

टोल फ्री क्रमांक: १०६४

मोबाइल क्रमांक (व्हाट्सऍप/फोन): ९४०३७८१०६४

अधिकाऱ्यांनी नागरिकांना भ्रष्टाचाराविरुद्ध आवाज उठवून भ्रष्टाचारमुक्त महाराष्ट्र घडवण्यासाठी विभागाला सहकार्य करण्याचे आवाहन केले. भिगवण येथील नागरिकांसाठी हा माहितीपर कार्यक्रम अत्यंत महत्त्वपूर्ण ठरला असून, यामुळे त्यांना लाचलुचपत प्रतिबंधक विभागाचे कार्य आणि तक्रार नोंदवण्याची प्रक्रिया याबद्दल सखोल माहिती मिळाली आहे.

आकाश पवार

divyajyotisamachar.in

The post भिगवण येथे लाचलुचपत प्रतिबंधक विभागाकडून भ्रष्टाचाराविरोधात जनजागृती appeared first on DIVYAJYOTI SAMACHAR.