विद्यार्थ्यांकडून गुरुजनांचा सन्मान; शिष्यवृत्तीधारकांचाही गौरव
भिगवण:
स्थानिक रयत शिक्षण संस्थेच्या न्यू इंग्लिश स्कूल, डोर्लेवाडी येथे आज गुरुपौर्णिमेनिमित्त उत्साहपूर्ण वातावरणात कार्यक्रमाचे आयोजन करण्यात आले. इयत्ता दहावीच्या विद्यार्थ्यांनी विद्यालयातील सर्व शिक्षकांना पेन व पुष्पगुच्छ देऊन कृतज्ञतापूर्वक सत्कार केला.
कार्यक्रमाच्या अध्यक्षस्थानी मुख्याध्यापक तुकाराम खताळ होते. त्यांनी अध्यक्षीय मनोगतातून गुरुपौर्णिमेचे महत्त्व विशद करत विद्यार्थ्यांना मार्गदर्शन केले आणि त्यांच्या कार्याचे कौतुक केले.
याच कार्यक्रमात इयत्ता सातवीच्या शिष्यवृत्ती परीक्षेत यश मिळवलेल्या गुणवंत विद्यार्थ्यांचाही विशेष सत्कार करण्यात आला. या यशामागे मोलाचे मार्गदर्शन करणारे शिक्षक श्रीमती वर्षा भंडलकर, दयाराम राजगुडे, विनोद शेगोकार आणि श्रीमती उज्वला जाधव यांचाही विद्यालयातर्फे गौरव करण्यात आला.
कार्यक्रमाचे सूत्रसंचालन अनुष्का बांधराव व ज्ञानेश्वरी साळुंके यांनी केले, तर आभारप्रदर्शन भाग्यश्री साळुंके हिने केले. दहावी ‘ब’ चे वर्गशिक्षक सुरेश शेलार यांच्या मार्गदर्शनाखाली विद्यार्थ्यांनी संपूर्ण नियोजन केले. यावेळी शिक्षक, शिक्षकेतर कर्मचारी व विद्यार्थी मोठ्या संख्येने उपस्थित होते.
