दाखले, सातबारा, अतिक्रमण नियमितीकरणासह एक खिडकीतून सर्व सेवा
भिगवण:
महाराष्ट्र शासनाच्या महसूल विभागाच्या वतीने इंदापूर विधानसभा मतदारसंघातील ग्रामीण जनता, शेतकरी, विद्यार्थी आणि महिलांच्या महसूलविषयक तसेच अन्य दैनंदिन प्रश्नांचे तातडीने निराकरण करण्यासाठी भव्य समाधान शिबिराचे आयोजन करण्यात आले आहे. मुख्यमंत्री श्री.देवेंद्रजी फडणवीस साहेब यांच्या वाढदिवसाचे औचित्य साधून तसेच माजी उपमुख्यमंत्री स्व. अजितदादा पवार यांच्या जयंतीनिमित्त “छत्रपती शिवाजी महाराज महाराजस्व समाधान शिबीर” या अभियानांतर्गत हे शिबीर होणार आहे.या शिबिराचे उद्घाटन राज्याचे कृषिमंत्री दत्तात्रय (मामा) भरणे यांच्या शुभहस्ते होणार आहे.
शनिवार, दि. १ ऑगस्ट २०२६ रोजी सकाळी १० ते सायंकाळी ५ या वेळेत व्यंकटेश लॉन्स, मदनवाडी, भिगवण, ता. इंदापूर येथे हे शिबीर पार पडेल. महसूल प्रशासन अधिक लोकाभिमुख, कार्यक्षम व गतिमान करणे हा या उपक्रमाचा मुख्य उद्देश असल्याचे प्रशासनाकडून सांगण्यात आले.
कोणकोणत्या सेवा मिळणार?
शिबिरात आधार कार्ड दुरुस्ती, एसटी महामंडळाचे एनसीएमसी कार्ड, कर्जमाफी प्रमाणीकरण, महिलांना शेतकरी दर्जा देण्याबाबतचे प्रमाणपत्र वाटप, गावठाणातील नागरिकांना स्वामित्व योजनेची सनद वाटप, मुख्यमंत्री बळीराजा शेत/पाणंद रस्ते योजना, तसेच शासकीय जमिनीवरील निवासी अतिक्रमणे नियमित करणे अशा सेवा उपलब्ध करून दिल्या जाणार आहेत.
याशिवाय तुकडेबंदी कायद्याअंतर्गत ‘स्थानिक क्षेत्र’ घोषणा, ‘जीवंत सातबारा’ मोहीम, राजमाता जिजाऊ महिला सक्षमीकरण योजना, पुरवठा विभागाच्या विविध सेवा, कुंभार समाजातील व्यक्तींना पारंपरिक व्यवसायासाठी सवलत आणि शेतजमिनीच्या कौटुंबिक वाटणीपत्रावरील नोंदणी फी पूर्णतः माफ करणे यांसारखे महत्त्वाचे लाभही नागरिकांना दिले जाणार आहेत.
एक खिडकी योजनेतून त्वरित निपटारा
उत्पन्न, रहिवासी, अधिवास, जात, नॉन क्रिमिलेअर आदी विविध दाखल्यांचे तात्काळ वाटप, सामाजिक अर्थसहाय्य योजनांतर्गत पात्र लाभार्थ्यांना लाभ वितरण, ई-मोजणी अर्ज स्वीकृती, घरकुल योजनेच्या लाभार्थ्यांसाठी विशेष तरतूद आणि पोटखराब क्षेत्र लागवडीयोग्य करण्याबाबतची प्रकरणे स्वीकारून मंजूर आदेशांचे वाटपही याच शिबिरात होणार आहे. सर्व प्रकारच्या अर्जांचा त्वरित निपटारा करण्यासाठी ‘एक खिडकी व्यवस्था’ कार्यरत राहणार आहे.
याखेरीज नागरिकांसाठी मोफत आरोग्य तपासणी शिबीर, रक्तदान शिबीर तसेच तालुक्यातील विविध प्रशासकीय विभागांमार्फत राबविल्या जाणाऱ्या शासकीय योजनांची माहितीही या ठिकाणी दिली जाणार आहे.
जिल्हा परिषद सदस्या सौ. मेघनाताई तुकाराम बंडगर तसेच पंचायत समिती सदस्या सौ. हेमाताई पद्माकर माडगे यांनी ग्रामीण भागातील नागरिक, शेतकरी, महिला व विद्यार्थ्यांनी या महसूल समाधान शिबिराचा जास्तीत जास्त संख्येने लाभ घ्यावा, असे आवाहन केले आहे.
