भिगवण पोलिसांची धडाकेबाज कारवाई!
भिगवण :-
भिगवण पोलिसांनी एका अट्टल घरफोड्या चोरट्याला गजाआड करून तब्बल ₹३.१३ लाखांचा मुद्देमाल जप्त केला आहे. विशेष म्हणजे हा चोरटा घराच्या बाथरूम पाईपवरून टेरेसवर चढून घरफोड्या करत असे. मोबाईलचा वापर न करता आणि वारंवार ठिकाणे बदलत तो पोलिसांना चकवत होता. मात्र, सातत्यपूर्ण तपास आणि तांत्रिक विश्लेषणाच्या आधारे पोलिसांनी अखेर त्याला अटक केली.
११ सप्टेंबर २०२५ रोजी दुपारी भिगवण (वार्ड क्र. ४) येथील योगेश उर्फ पांडुरंग जानराव यांच्या घरात ही घरफोडी झाली. चोरट्याने टेरेसवरून खिडकीची जाळी तोडून घरात प्रवेश केला. त्यानंतर घरातील वडिलांना एका खोलीत कोंडून दुसऱ्या खोलीतील कपाट फोडून सोन्या-चांदीचे दागिने व रोख रक्कम असा एकूण ₹५.४४ लाखांचा ऐवज लंपास केला. या घटनेमुळे परिसरात भीतीचे वातावरण निर्माण झाले होते.
भिगवण पोलिसांसमोर हा गुन्हा उघडकीस आणणे मोठे आव्हान होते. सहाय्यक पोलीस निरीक्षक विनोद महांगडे यांनी तातडीने तपास पथक स्थापन केले. पोलिस कर्मचारी संतोष मखरे आणि योगेश कुलकर्णी यांनी परिसरातील ५० हून अधिक सीसीटीव्ही फुटेज तपासून एका संशयिताचा माग काढला. फुटेजमधील व्यक्तीचा फोटो ‘महाराष्ट्र क्राईम पोलीस ग्रुप’वर प्रसारित केल्यानंतर त्या व्यक्तीची ओळख पटली.
तो आरोपी म्हणजेच रेकॉर्डवरील अट्टल घरफोड्या चोरटा छोटू उर्फ अस्लम उर्फ राजू कुंडलीक म्हेत्रे (रा. शिवाजीनगर, निलंगा, जि. लातूर) असल्याचे निष्पन्न झाले. मोबाईल वापरत नसल्याने आणि वारंवार ठिकाण बदलत असल्याने त्याचा शोध घेणे कठीण झाले होते.
तरीदेखील उपनिरीक्षक अमित पाटील, महेश उगले, सचिन पवार, संतोष मखरे आणि योगेश कुलकर्णी यांच्या विशेष पथकाने लातूर आणि रायगड जिल्ह्यांत तपासमोहीम राबवली. तब्बल पाच दिवसांच्या पाळतीनंतर, १ ऑक्टोबर रोजी आरोपीला कर्जत (जि. रायगड) येथून ताब्यात घेण्यात आले. चौकशीत त्याने गुन्ह्याची कबुली दिल्यानंतर त्याला अटक करून ₹३.१३ लाखांचा मुद्देमाल हस्तगत करण्यात आला.
अटक आरोपी छोटू उर्फ अस्लम उर्फ राजू म्हेत्रे (वय २५, सध्या रा. आमराई, कर्जत, जि. रायगड) हा अट्टल गुन्हेगार असून त्याच्यावर निलंगा, शिवाजीनगर, शिरूर आनंदपाल आणि देवणी पोलिस ठाण्यांत १२ घरफोडी गुन्हे दाखल आहेत.
या यशस्वी कारवाईबद्दल पोलीस अधीक्षक संदीपसिंह गिल्ल, अपर पोलीस अधीक्षक गणेश बिरादार, उपविभागीय पोलीस अधिकारी डॉ. सुदर्शन राठोड आणि स्थानिक गुन्हे शाखेचे वरिष्ठ पोलीस निरीक्षक अविनाश शिळीमकर यांनी भिगवण पोलिसांच्या पथकाचे कौतुक केले आहे.
या गुन्ह्याचा पुढील तपास पोलीस उपनिरीक्षक अमित पाटील करीत आहेत.
