भिगवण :
सायकलिंगमुळे रोगमुक्त आणि तणावमुक्त जीवनशैली जगता येते, हा संदेश घेऊन भिगवण सायकल क्लबच्या सायकलप्रेमींनी भिगवण ते पंढरपूर अशी ११० किलोमीटरची सायकल वारी यशस्वीरित्या पूर्ण केली. या आगळ्यावेगळ्या वारीदरम्यान त्यांनी मार्गावरील लोकांना पर्यावरण संरक्षण आणि निरोगी आरोग्यासाठी सायकल चालवण्याचे महत्त्व पटवून दिले.
क्लबचे प्रमुख केशव भापकर यांनी सांगितले की, हा अनुभव खूपच आनंददायी होता. पंढरपूर वारीमध्ये सायकल चालवत पर्यावरण जागृतीचा संदेश प्रत्येकापर्यंत पोहोचवण्यात यश आले. गेल्या अनेक वर्षांपासून क्लबकडून सायकल वारीचा हा उपक्रम राबवण्यात येत आहे, आणि यासाठी सातत्यपूर्ण सराव करत असल्याचेही भापकर यांनी नमूद केले.वारी मार्गावर ठिकठिकाणी ग्रामस्थांनी सायकलपटूंचे उत्साहात स्वागत केले आणि त्यांचा पाहुणचार केला. या वेळी सायकलपटूंनीही ग्रामस्थांना पर्यावरण रक्षण आणि सायकलिंगचे आरोग्य फायदे समजावून सांगितले.
या सायकल वारीमध्ये डॉ. संकेत मोरे, डॉ. अमित खानावरे, केशव भापकर, संतोष दाताळ, कुंडलिक भांडवलकर, अर्जुन तोडेकर, आणि धनाजी नलावडे हे सायकलप्रेमी सहभागी झाले होते. त्यांच्या या प्रयत्नांमुळे सायकलिंगचे महत्त्व आणि पर्यावरण संरक्षणाचा संदेश मोठ्या जनसमुदायापर्यंत पोहोचण्यास मदत झाली आहे.
