भिगवण शिक्षण प्रसारक मंडळ संचलित लोकनेते शरदचंद्रजी पवार शिक्षणशास्त्र (बी.एड) महाविद्यालयाच्या वतीने सामाजिक बांधिलकीची जाणीव जपत ऊसतोड कामगार महिलांना साड्या आणि लहान मुलांना कपड्यांचे वाटप करण्यात आले. या उपक्रमामुळे कामगार महिलांच्या आणि बालकांच्या चेहऱ्यावर आनंद ओसंडून वाहत होता.
साखर गाळप हंगाम सुरू झाल्याने भिगवण व परिसरात बीड, नगर जिल्ह्यातून ऊसतोड मजूर दाखल झाले आहेत. दिवसभर उसाच्या फडात राबणाऱ्या या कष्टकऱ्यांच्या जीवनात थोडासा दिलासा देण्याच्या उद्देशाने हा उपक्रम राबविण्यात आला. या कुटुंबांतील लहान मुले कामाच्या ठिकाणीच वाढत असतात, त्यांच्या अंगावरील फाटलेली कपडे त्यांच्या परिस्थितीचे वास्तव सांगतात. अशा परिस्थितीत त्यांना आपुलकीची ऊब देण्यासाठी महाविद्यालयाने दरवर्षीप्रमाणे याही वर्षी मदतीचा हात पुढे केला.
“वंचित घटकांपर्यंत आपुलकी पोहोचवणे हेच शिक्षणाचे खरे सार आहे. समाजाशी नाळ जोडून ठेवणे ही आमची जबाबदारी आहे. दरवर्षी ऊसतोड कामगारांसाठी काही ना काही उपक्रम राबवून त्यांच्या अडचणींमध्ये थोडी मदत करण्याचा प्रयत्न आम्ही करतो.” असे प्राचार्या डॉ. उज्वला लोणकर यांनी सांगितले.
या वेळी प्रा. तुषार क्षीरसागर, नवनाथ सावंत, नीलिमा मदने, प्रा. लंबाते, अर्चना खैरे, बाळू होले, गणेश गावडे, राहुल चव्हाण आदी शिक्षक व शिक्षकेतर कर्मचारी उपस्थित होते.
भिगवण बी.एड महाविद्यालयाने शिक्षणाबरोबर सामाजिक जबाबदारीची जाणीव जपत समाजातील वंचित घटकांपर्यंत आपुलकीचा स्पर्श पोहोचवून एक आदर्श निर्माण केला आहे.
