भिगवण :-
पुणे–सोलापूर राष्ट्रीय महामार्गावर गुरुवारी सायंकाळी मौजे डाळज नं. २ येथे झालेल्या भीषण अपघातात तिघांचा मृत्यू झाला, तर तिघे जखमी झाले. सायंकाळी सुमारे ५ वाजण्याच्या सुमारास सोलापूर–पुणे महामार्गावर आयशर टेम्पोचा टायर पंक्चर झाल्याने संबंधित वाहन महामार्गाच्या कडेला उभे होते. त्याच वेळी पाठीमागून येणाऱ्या मारुती सुझुकी इको या गाडीने उभ्या टेम्पोला धडक दिली. धडक इतकी जोरदार होती की इको गाडीचा पुढील भाग पूर्णपणे चक्काचूर झाला.
इको गाडीत एकूण सहा प्रवासी प्रवास करत होते. त्यापैकी आदिती अमर हातेकर (वय २५, रा. सांगोला, जि. सोलापूर), सखुबाई ईश्वर गेजगे (वय ६०, रा. सांगोला, जि. सोलापूर) आणि जय अमर हातेकर (वय २ वर्षे, रा. सांगोला, जि. सोलापूर) यांचा मृत्यू झाला.
या अपघातात चालक कबीरदास ईश्वर गेजगे (वय ५०, रा. पाटस) हे गंभीर जखमी झाले असून स्वाती कबीरदास गेजगे (वय ३४, रा. पाटस) व समृद्धी कबीरदास गेजगे (वय १० महिने, रा. पाटस) हे किरकोळ जखमी झाले आहेत. जखमींना तातडीने जवळच्या रुग्णालयात उपचारासाठी दाखल करण्यात आले आहे.
घटनेची माहिती मिळताच भिगवण पोलिसांनी घटनास्थळी धाव घेतली. अपघातानंतर काही काळ महामार्गावरील वाहतूक विस्कळीत झाली होती; मात्र पोलिसांनी तत्परता दाखवत वाहतूक सुरळीत केली. मृतदेह शवविच्छेदनासाठी पाठवण्यात आले असून, याप्रकरणी गुन्हा दाखल करण्याचे काम सुरू आहे.
