विद्या प्रतिष्ठान अनंतराव पवार इंग्लिश मिडियम स्कूल (सीबीएसई), चिंचोली येथे इयत्ता सातवी व आठवीच्या विद्यार्थ्यांसाठी “संवादात्मक व्याख्यान व सूक्ष्मदर्शक निरीक्षण सत्र” उत्साहपूर्ण वातावरणात पार पडले. हा उपक्रम नॅशनल ॲकॅडमी ऑफ सायन्सेस, इंडिया (NASI) – पुणे शाखा, नॅशनल सेंटर फॉर सेल सायन्स (NCCS), पुणे आणि आगरकर संशोधन संस्था (ARI), पुणे यांच्या संयुक्त विद्यमाने आयोजित करण्यात आला होता.

या सत्रात डॉ. शर्मिला बापट, डॉ. सुरेंद्र घासकडबी, कु. उत्कर्षा टिकोले आणि श्री. मदन पी. या शास्त्रज्ञांनी विद्यार्थ्यांना मार्गदर्शन केले. त्यांनी सूक्ष्मजीवांचे महत्त्व, सूक्ष्मदर्शकाची उपयुक्तता, वैज्ञानिक निरीक्षण पद्धती तसेच दैनंदिन जीवनातील सूक्ष्मजीवांची भूमिका याविषयी सविस्तर माहिती दिली. पर्यावरण संवर्धन आणि वैज्ञानिक संशोधनामध्ये सूक्ष्मदर्शकाचे योगदानही त्यांनी विद्यार्थ्यांना सोप्या भाषेत समजावून सांगितले.

सत्रातील प्रमुख आकर्षण म्हणजे विद्यार्थ्यांना अत्याधुनिक सूक्ष्मदर्शकाच्या सहाय्याने हायड्रा आणि डायटॉम्स यांच्या स्लाईड्सचे प्रत्यक्ष निरीक्षण करण्याची मिळालेली संधी. यावेळी विद्यार्थ्यांनी सूक्ष्म शैवालांची वैशिष्ट्ये, त्यांच्या सिलिका पेशीभित्तीची रचना, ऑक्सिजन निर्मितीतील त्यांचे योगदान तसेच जलपरिसंस्थेतील त्यांचे महत्त्व प्रत्यक्ष अनुभवातून जाणून घेतले.

या उपक्रमामुळे विद्यार्थ्यांमध्ये वैज्ञानिक दृष्टिकोन, निरीक्षण कौशल्य आणि संशोधनाची आवड अधिक वृद्धिंगत झाली. विद्यार्थ्यांनी शास्त्रज्ञांना विविध प्रश्न विचारत सत्रात उत्स्फूर्त सहभाग नोंदविला.

कार्यक्रमाचे सूत्रसंचालन रेखा जाधव यांनी केले, तर आभार प्रदर्शन राधिका प्राक्टूर यांनी केले. शाळेच्या प्राचार्या डॉ. सरिता शिंदे तसेच विज्ञान विभागातील सर्व शिक्षिकांच्या सहकार्याने हा उपक्रम यशस्वीरित्या पार पडला.

आकाश पवार

divyajyotisamachar.in

The post भिगवणमध्ये विद्यार्थ्यांचा विज्ञानाशी प्रत्यक्ष संवाद; सूक्ष्मदर्शकातून हायड्रा व डायटॉम्सचे निरीक्षण appeared first on DIVYAJYOTI SAMACHAR.

इंदापूर तालुका शिक्षण प्रसारक मंडळाच्या कला, विज्ञान व वाणिज्य महाविद्यालय, भिगवण येथे लोकशाहीर अण्णाभाऊ साठे यांची जयंती तसेच लोकमान्य बाळ गंगाधर टिळक यांची पुण्यतिथी उत्साहपूर्ण वातावरणात साजरी करण्यात आली.

कार्यक्रमाच्या प्रारंभी उपस्थित मान्यवरांच्या हस्ते अण्णाभाऊ साठे व लोकमान्य टिळक यांच्या प्रतिमेचे पूजन करण्यात आले. डॉ. सुरेंद्र शिरसट यांनी प्रास्ताविक करताना अण्णाभाऊ साठे यांचे साहित्य, सामाजिक कार्य आणि कष्टकरी समाजाच्या उन्नतीसाठीचे योगदान विशद करून त्यांच्या विचारांची आजच्या काळातील आवश्यकता अधोरेखित केली.

त्यानंतर प्रा. धनाजी मत्रे व डॉ. प्रज्ञा लामतुरे यांनी मनोगत व्यक्त करत अण्णाभाऊ साठे यांच्या साहित्यिक, सामाजिक आणि परिवर्तनवादी कार्यावर प्रकाश टाकला. अध्यक्षीय मनोगतात महाविद्यालयाचे प्राचार्य डॉ. तानाजी मगर यांनी विद्यार्थ्यांनी अण्णाभाऊ साठे यांच्या विचारांचा आदर्श घेऊन समाजहितासाठी कार्य करण्याचे आवाहन केले.

यावेळी डॉ. पद्माकर गाडेकर, डॉ. अनिल बनसोडे, प्रा. रोहन व्यवहारे उपस्थित होते. कार्यक्रमाचे सूत्रसंचालन प्रा. गणेश मोरे यांनी केले, तर आभारप्रदर्शन प्रा. सारीका पाटील यांनी केले. या कार्यक्रमासाठी महाविद्यालयातील प्राध्यापक, प्राध्यापकेत्तर कर्मचारी व विद्यार्थी मोठ्या संख्येने उपस्थित होते.

आकाश पवार

divyajyotisamachar.in

The post कला, विज्ञान आणि वाणिज्य महाविद्यालय भिगवण येथे अण्णाभाऊ साठे जयंती उत्साहात साजरी appeared first on DIVYAJYOTI SAMACHAR.

भिगवण:

महाराष्ट्र शासनाच्या महसूल विभागाच्या वतीने इंदापूर विधानसभा मतदारसंघातील ग्रामीण जनता, शेतकरी, विद्यार्थी आणि महिलांच्या महसूलविषयक तसेच अन्य दैनंदिन प्रश्नांचे तातडीने निराकरण करण्यासाठी भव्य समाधान शिबिराचे आयोजन करण्यात आले आहे. मुख्यमंत्री श्री.देवेंद्रजी फडणवीस साहेब यांच्या वाढदिवसाचे औचित्य साधून तसेच माजी उपमुख्यमंत्री स्व. अजितदादा पवार यांच्या जयंतीनिमित्त “छत्रपती शिवाजी महाराज महाराजस्व समाधान शिबीर” या अभियानांतर्गत हे शिबीर होणार आहे.या शिबिराचे उद्घाटन राज्याचे कृषिमंत्री दत्तात्रय (मामा) भरणे यांच्या शुभहस्ते होणार आहे.

शनिवार, दि. १ ऑगस्ट २०२६ रोजी सकाळी १० ते सायंकाळी ५ या वेळेत व्यंकटेश लॉन्स, मदनवाडी, भिगवण, ता. इंदापूर येथे हे शिबीर पार पडेल. महसूल प्रशासन अधिक लोकाभिमुख, कार्यक्षम व गतिमान करणे हा या उपक्रमाचा मुख्य उद्देश असल्याचे प्रशासनाकडून सांगण्यात आले.

कोणकोणत्या सेवा मिळणार?

शिबिरात आधार कार्ड दुरुस्ती, एसटी महामंडळाचे एनसीएमसी कार्ड, कर्जमाफी प्रमाणीकरण, महिलांना शेतकरी दर्जा देण्याबाबतचे प्रमाणपत्र वाटप, गावठाणातील नागरिकांना स्वामित्व योजनेची सनद वाटप, मुख्यमंत्री बळीराजा शेत/पाणंद रस्ते योजना, तसेच शासकीय जमिनीवरील निवासी अतिक्रमणे नियमित करणे अशा सेवा उपलब्ध करून दिल्या जाणार आहेत.

याशिवाय तुकडेबंदी कायद्याअंतर्गत ‘स्थानिक क्षेत्र’ घोषणा, ‘जीवंत सातबारा’ मोहीम, राजमाता जिजाऊ महिला सक्षमीकरण योजना, पुरवठा विभागाच्या विविध सेवा, कुंभार समाजातील व्यक्तींना पारंपरिक व्यवसायासाठी सवलत आणि शेतजमिनीच्या कौटुंबिक वाटणीपत्रावरील नोंदणी फी पूर्णतः माफ करणे यांसारखे महत्त्वाचे लाभही नागरिकांना दिले जाणार आहेत.

एक खिडकी योजनेतून त्वरित निपटारा

उत्पन्न, रहिवासी, अधिवास, जात, नॉन क्रिमिलेअर आदी विविध दाखल्यांचे तात्काळ वाटप, सामाजिक अर्थसहाय्य योजनांतर्गत पात्र लाभार्थ्यांना लाभ वितरण, ई-मोजणी अर्ज स्वीकृती, घरकुल योजनेच्या लाभार्थ्यांसाठी विशेष तरतूद आणि पोटखराब क्षेत्र लागवडीयोग्य करण्याबाबतची प्रकरणे स्वीकारून मंजूर आदेशांचे वाटपही याच शिबिरात होणार आहे. सर्व प्रकारच्या अर्जांचा त्वरित निपटारा करण्यासाठी ‘एक खिडकी व्यवस्था’ कार्यरत राहणार आहे.

याखेरीज नागरिकांसाठी मोफत आरोग्य तपासणी शिबीर, रक्तदान शिबीर तसेच तालुक्यातील विविध प्रशासकीय विभागांमार्फत राबविल्या जाणाऱ्या शासकीय योजनांची माहितीही या ठिकाणी दिली जाणार आहे.

जिल्हा परिषद सदस्या सौ. मेघनाताई तुकाराम बंडगर तसेच पंचायत समिती सदस्या सौ. हेमाताई पद्माकर माडगे यांनी ग्रामीण भागातील नागरिक, शेतकरी, महिला व विद्यार्थ्यांनी या महसूल समाधान शिबिराचा जास्तीत जास्त संख्येने लाभ घ्यावा, असे आवाहन केले आहे.

आकाश पवार

divyajyotisamachar.in

The post भिगवणमध्ये १ ऑगस्ट ला महसूल समाधान शिबीर; कृषिमंत्री दत्तात्रय मामा भरणे यांच्या हस्ते उद्घाटन appeared first on DIVYAJYOTI SAMACHAR.

भिगवण:

स्थानिक रयत शिक्षण संस्थेच्या न्यू इंग्लिश स्कूल, डोर्लेवाडी येथे आज गुरुपौर्णिमेनिमित्त उत्साहपूर्ण वातावरणात कार्यक्रमाचे आयोजन करण्यात आले. इयत्ता दहावीच्या विद्यार्थ्यांनी विद्यालयातील सर्व शिक्षकांना पेन व पुष्पगुच्छ देऊन कृतज्ञतापूर्वक सत्कार केला.

कार्यक्रमाच्या अध्यक्षस्थानी मुख्याध्यापक तुकाराम खताळ होते. त्यांनी अध्यक्षीय मनोगतातून गुरुपौर्णिमेचे महत्त्व विशद करत विद्यार्थ्यांना मार्गदर्शन केले आणि त्यांच्या कार्याचे कौतुक केले.
याच कार्यक्रमात इयत्ता सातवीच्या शिष्यवृत्ती परीक्षेत यश मिळवलेल्या गुणवंत विद्यार्थ्यांचाही विशेष सत्कार करण्यात आला. या यशामागे मोलाचे मार्गदर्शन करणारे शिक्षक श्रीमती वर्षा भंडलकर, दयाराम राजगुडे, विनोद शेगोकार आणि श्रीमती उज्वला जाधव यांचाही विद्यालयातर्फे गौरव करण्यात आला.
कार्यक्रमाचे सूत्रसंचालन अनुष्का बांधराव व ज्ञानेश्वरी साळुंके यांनी केले, तर आभारप्रदर्शन भाग्यश्री साळुंके हिने केले. दहावी ‘ब’ चे वर्गशिक्षक सुरेश शेलार यांच्या मार्गदर्शनाखाली विद्यार्थ्यांनी संपूर्ण नियोजन केले. यावेळी शिक्षक, शिक्षकेतर कर्मचारी व विद्यार्थी मोठ्या संख्येने उपस्थित होते.

आकाश पवार

divyajyotisamachar.in

The post न्यू इंग्लिश स्कूल डोर्लेवाडीत गुरुपौर्णिमा उत्साहात साजरी appeared first on DIVYAJYOTI SAMACHAR.

स्व.अजितदादा पवार यांच्या जयंतीनिमित्त विद्या प्रतिष्ठान अनंतराव पवार इंग्लिश मीडियम स्कूल, चिंचोली येथे मंगळवारी ‘Vox Nova २०२६’ आंतरशालेय इंग्रजी वक्तृत्व स्पर्धेचे उत्साहात आयोजन करण्यात आले होते. विद्यार्थ्यांच्या इंग्रजी भाषेवरील प्रभुत्व, विचारांची मांडणी, आत्मविश्वास आणि सार्वजनिक वक्तृत्व कौशल्य विकसित करण्याच्या उद्देशाने आयोजित या स्पर्धेत एकूण १२ शाळांमधील ४६ विद्यार्थ्यांनी सहभाग घेतला. विविध शाळांतील विद्यार्थ्यांच्या उत्कृष्ट सादरीकरणाने या स्पर्धेला एक उच्च दर्जा प्राप्त करून दिला.

स्पर्धेत दोन गट करण्यात आले होते. इयत्ता ६ वी व ७ वीच्या पहिल्या गटात २४, तर इयत्ता ९ वी व १० वीच्या दुसऱ्या गटात २२ स्पर्धकांनी प्रभावी वक्तृत्व सादर करून उपस्थितांची मने जिंकली. अतिशय अटीतटीच्या झालेल्या या स्पर्धेत पहिल्या गटात (इयत्ता ६ वी व ७ वी) कु. श्रीजा गावडे (विद्या प्रतिष्ठान इंग्लिश मीडियम स्कूल, बारामती) हिने प्रथम, तर कुमार सतीश पाटील (विद्या प्रतिष्ठान इंदापूर इंग्लिश मीडियम स्कूल, इंदापूर) यांनी द्वितीय क्रमांक पटकावला. तसेच, दुसऱ्या गटात (इयत्ता ९ वी व १० वी) कु. उद्विता राठोड (विद्या प्रतिष्ठान नांदेड सिटी पब्लिक स्कूल, पुणे) हिने प्रथम, तर कु. आर्या दोभाडा (विद्या प्रतिष्ठान अनंतराव पवार इंग्लिश मीडियम स्कूल, चिंचोली) हिने द्वितीय क्रमांक मिळवला.

स्पर्धेसाठी श्री. उदय पाटील (विद्या प्रतिष्ठान कला, विज्ञान आणि वाणिज्य महाविद्यालय, बारामती), श्री. संजय दीक्षित (फलटण एज्युकेशन सोसायटीचे मुधोजी महाविद्यालय, फलटण), श्री. सुहास राऊत (तुळजाराम चतुरचंद महाविद्यालय, बारामती) तसेच सौ. ओमी पिरजादे (विद्या प्रतिष्ठान वसंतराव पवार लॉ कॉलेज, बारामती) यांनी परीक्षक म्हणून काम पाहिले. स्पर्धेचे सूत्रसंचालन सौ. ज्योत्स्ना पाटील व सौ. सोनम गवळी यांनी केले, तर सौ. दीपा भोईटे आणि सौ. मनिषा मलगुंडे यांनी नियोजन व व्यवस्थापन पार पाडले. शाळेच्या प्राचार्या डॉ. सरिता शिंदे यांच्या मार्गदर्शनाखाली ही स्पर्धा अत्यंत यशस्वीरीत्या संपन्न झाली.

आकाश पवार

divyajyotisamachar.in

The post विद्या प्रतिष्ठान चिंचोलीत ‘Vox Nova २०२६’ स्पर्धा उत्साहात; श्रीजा गावडे व उद्विता राठोड ठरल्या प्रथम appeared first on DIVYAJYOTI SAMACHAR.

भिगवण:

राष्ट्रीय पात्रता व प्रवेश परीक्षेत (NEET) नेत्रदीपक यश संपादन करत देशात मुलींच्या गटात प्रथम क्रमांक पटकावणाऱ्या श्रावणी कुदळे हिचा भिगवण रोटरी क्लबतर्फे विशेष सत्कार करण्यात आला. यासोबतच नीट परीक्षेत उल्लेखनीय यश मिळवणाऱ्या अनुश्री थोरात, प्रणव टेंभुर्णे व समर्थ खनावरे या गुणवंत विद्यार्थ्यांचाही यावेळी रोटरी क्लबच्या वतीने गौरव करण्यात आला.

कार्यक्रमाच्या अध्यक्षस्थानी जिल्हा परिषद सदस्या मेघनाताई बंडगर होत्या, तर प्रमुख पाहुणे म्हणून भिगवणचे माजी सरपंच बापूराव थोरात उपस्थित होते.

कार्यक्रमाचे प्रास्ताविक करताना रोटरी क्लबचे सचिव डॉ. प्रशांत चवरे म्हणाले की, “नीटसारख्या अत्यंत कठीण आणि स्पर्धात्मक परीक्षेत देशात अव्वल येणे ही केवळ तिच्या कुटुंबासाठीच नव्हे, तर संपूर्ण राज्यासाठी अभिमानास्पद बाब आहे. या विद्यार्थ्यांनी मिळवलेले यश त्यांच्या अथक परिश्रमाचे फळ असून, ते परिसरातील अन्य विद्यार्थ्यांसाठी नक्कीच प्रेरणादायी ठरेल.”

यावेळी सत्कारमूर्ती श्रावणी कुदळे हिने आपले मनोगत व्यक्त करताना सांगितले की, “सातत्यपूर्ण अभ्यास, शिक्षकांचे योग्य मार्गदर्शन आणि पालकांचा पाठिंबा या यशाच्या मुळाशी आहे. अभ्यासाच्या काळात मोबाईलचा वापर टाळल्याने अभ्यासावर पूर्ण लक्ष केंद्रित करणे शक्य झाले. रोटरी क्लबने केलेला हा सन्मान माझ्या पुढील वैद्यकीय प्रवासासाठी मोठी ऊर्जा देणारा आहे.”

या सोहळ्यास भिगवण रोटरी क्लबचे अध्यक्ष प्रवीण वाघ, संजय चौधरी, रियाज शेख, संपत बंडगर, औदुंबर हुलगे, अल्ताफ शेख, संजय खाडे, नामदेव कुदळे, कमलेश गांधी, केशव भापकर, योगेश चव्हाण आणि प्रसाद पाटील यांच्यासह वैद्यकीय क्षेत्रातील तज्ज्ञ, शहरातील मान्यवर नागरिक व विद्यार्थ्यांचे पालक मोठ्या संख्येने उपस्थित होते. कार्यक्रमाचे आभार सचिन बोगावत यांनी मानले.

कार्यक्रमाच्या शेवटी उपस्थितांनी सर्व यशस्वी विद्यार्थ्यांचे अभिनंदन करत, त्यांच्या भावी वैद्यकीय शिक्षण व सेवेच्या प्रवासासाठी मनापासून शुभेच्छा दिल्या.

आकाश पवार

divyajyotisamachar.in

The post नीट परीक्षेत देशात अव्वल ठरलेल्या श्रावणी कुदळेसह भिगवणच्या गुणवंतांचा रोटरी क्लबकडून गौरव appeared first on DIVYAJYOTI SAMACHAR.

भिगवण:

भिगवण सायकल क्लबच्या वतीने दरवर्षी आयोजित करण्यात येणारी भिगवण ते पंढरपूर सायकल वारी यंदा नवव्या वर्षात दि. १६ रोजी उत्साहात पार पडली. सदस्यांनी ११५ किलोमीटरचे हे अंतर सायकलवरून पूर्ण करत ‘सायकल चालवा, तंदुरुस्त राहा’ आणि ‘झाडे लावा, झाडे जगवा’ असा जनजागृतीचा संदेश दिला.

पहाटे दोन वाजता भिगवणहून निघालेला हा सायकलपटूंचा ताफा इंदापूर-अकलूज या पालखी मार्गे सकाळी दहा वाजता पंढरपूरला पोहोचला. यात ११ वर्षांचा सार्थक चव्हाण हा बालसदस्य आणि ६८ वर्षांचे सेवानिवृत्त मेजर भांडवलकर हे ज्येष्ठ सदस्य असे विविध वयोगटांतील सायकलपटू सहभागी झाले होते, हे या उपक्रमाचे विशेष आकर्षण ठरले.

भिगवण सायकल क्लबचे सदस्य वर्षभर विविध सायकल राईडमध्ये सक्रिय सहभाग घेत असतात. यातील अनेक सदस्य नियमितपणे शंभर ते दोनशे किलोमीटरचे अंतर सायकलवर कापतात. स्वतःचे आरोग्य जपणे, रोगप्रतिकारक शक्ती वाढवणे आणि त्याचबरोबर समाजात आरोग्याविषयी जागरूकता निर्माण करणे, हा या उपक्रमामागील मुख्य उद्देश आहे.

प्रवासादरम्यान सदस्यांच्या सुविधेसाठी सामाजिक कार्यकर्ते चंद्रशेखर पवार यांनी टेम्पोची व्यवस्था उपलब्ध करून दिली. सदस्यांना प्रोत्साहन देण्यासाठी क्लबचे माजी अध्यक्ष संपत बंडगर, अल्ताफ शेख, नामदेव कुदळे आणि साहिल मुलानी यांनीही यात सहभाग नोंदवला.

या उपक्रमात क्लबचे अर्जुन तोडकर, केशव भापकर, संतोष सवाने, विजयकुमार हंगे, श्याम सातार्ले, औदुंबर हुलगे, योगेश चव्हाण, डॉ. भरत भरणे, कुलदीपक ननवरे, डॉ. अमित खानावरे, अथर्व दाताळ आणि डॉ. संकेत मोरे या सदस्यांनी सहभाग घेतला. सायकल प्रवास यशस्वीरीत्या पूर्ण केल्याबद्दल भिगवण रोटरी क्लबचे अध्यक्ष प्रवीण वाघ, निखिल बोगावत आणि रियाज शेख यांनी सर्व सहभागी सायकलपटूंचे अभिनंदन केले.

आकाश पवार

divyajyotisamachar.in

The post भिगवणकरांची पंढरीला ‘सायकल वारी’; ११५ किमीचा प्रवास उत्साहात संपन्न! appeared first on DIVYAJYOTI SAMACHAR.

पुणे, सोलापूर आणि अहिल्यानगर या तीन जिल्ह्यांच्या सीमावर्ती भागातील महत्त्वाचे दळणवळण केंद्र असलेल्या भिगवण (ता. इंदापूर) येथील बसस्थानकाचा प्रश्न आता अत्यंत गंभीर बनला आहे. बसस्थानकाच्या नूतनीकरणाचे काम अत्यंत संथ गतीने सुरू असल्याने प्रवासी, शाळकरी विद्यार्थी, महिला आणि ज्येष्ठ नागरिकांना सध्या ऊन, पाऊस आणि चिखलाचा सामना करावा लागत आहे. प्रशासकीय अनास्थेमुळे येथील प्रवाशांची मोठी ससेहोलपट होत असून नागरिकांमधून आता तीव्र संताप व्यक्त केला जात आहे.

भिगवण येथील नवीन सुसज्ज बसस्थानकासह विविध विकासकामांसाठी २२ कोटी २५ लाख रुपयांचा भव्य निधी मंजूर करण्यात आला आहे. जानेवारी २०२६ मध्ये राज्याचे कृषिमंत्री दत्तात्रय भरणे यांच्या हस्ते या कामाचे भूमिपूजन अत्यंत उत्साहात पार पडले होते. भूमिपूजनानंतर प्रशासनाने जुनी इमारत तातडीने पाडण्याची तत्परता दाखवली, मात्र त्यानंतर नवीन इमारतीचे बांधकाम पूर्णपणे बंद पडले आहे.

भिगवण हे इंदापूर, बारामती, दौंड, करमाळा आणि कर्जत या पाच तालुक्यांतील प्रवाशांसाठी मुख्य केंद्र आहे. येथून दररोज सुमारे ३५० ते ४०० एसटी बसफेऱ्या होत असतात, तर अंदाजे ३ हजार ५०० ते ४ हजार प्रवासी रोज या स्थानकाचा वापर करतात. एवढ्या मोठ्या संख्येने येणाऱ्या प्रवाशांच्या सोयीकडे पूर्णपणे दुर्लक्ष झाले आहे. सध्या पावसाळ्याचे दिवस असल्याने बसस्थानक परिसरात मोठ्या प्रमाणावर चिखल झाला असून पाण्याचे डबके साचले आहेत.

जुनी इमारत पाडल्यानंतरचा दगड-मातीचा ढिगारा अद्यापही तसाच पडून असल्याने प्रवाशांना बसमध्ये चढताना आणि उतरताना मोठी कसरत करावी लागत आहे. प्रशासनाने उभारलेले तात्पुरते शेड प्रवाशांच्या संख्येच्या तुलनेत अत्यंत अपुरे पडत असल्याने बहुतांश नागरिकांना उघड्यावरच थांबावे लागत आहे.

परिसरात शाळा आणि महाविद्यालये असल्याने रोज प्रवास करणाऱ्या विद्यार्थिनींची संख्या मोठी आहे. मात्र, बसस्थानकाची हक्काची इमारत नसल्याने व परिसर ओसाड झाल्याने विद्यार्थिनींच्या सुरक्षेचा गंभीर प्रश्न निर्माण झाला आहे. त्यातच आगामी आषाढी वारीच्या पार्श्वभूमीवर पंढरपूरकडे जाणाऱ्या वारकऱ्यांची मोठी गर्दी या मार्गावर होणार आहे. भिगवण हे वारकऱ्यांचे प्रमुख थांबे असल्याने, बसस्थानकाची ही दुरवस्था पाहता वारीच्या काळात वारकऱ्यांचे प्रचंड हाल होण्याची दाट शक्यता आहे. त्यामुळे परिवहन महामंडळाने तात्पुरती मलमपट्टी न करता युद्धपातळीवर बसस्थानकाचे काम पूर्ण करावे, अशी मागणी आता जोर धरू लागली आहे.

“भूमिपूजन झाले तेव्हा वाटले होते की लवकरच हक्काचे आणि आधुनिक बस स्थानक मिळेल. पण जुनेही गेले आणि नवीनही मिळेना अशी आमची अवस्था झाली आहे. या रखडलेल्या कामामुळे येथील प्रवाशांचे प्रचंड हाल होत आहेत,”

— बॉबी एम. थॉमस , स्थानिक नागरिक

आकाश पवार

divyajyotisamachar.in

The post भिगवण बसस्थानकाचे काम रखडले; कागदावर ‘सुसज्ज’, प्रत्यक्षात प्रवासी उघड्यावर! appeared first on DIVYAJYOTI SAMACHAR.

विद्या प्रतिष्ठान अनंतराव पवार इंग्लिश मिडीयम स्कूल चिंचोली च्या दोन विद्यार्थिनींनी राष्ट्रीय स्तरावर आपल्या साहित्यिक प्रतिभेचा ठसा उमटवत शाळेच्या नावाला नवा मान मिळवून दिला आहे. कु. अनुष्का कन्हेरकर आणि कु. रितिका धुमाळ यांच्या हिंदी कविता भारत सरकारच्या उद्योग संवर्धन व व्यापार विभाग अंतर्गत कार्यालय महानियंत्रक (अभिकल्प व व्यापार चिन्ह) यांच्या वतीने प्रकाशित ‘अटल बाल हिंदी कविता संग्रह – २०२५’ या प्रतिष्ठित राष्ट्रीय काव्यसंग्रहासाठी निवडल्या गेल्या असून त्यांच्या कवितांना राष्ट्रीय स्तरावर मान्यता मिळाली आहे. युवा पिढीमध्ये हिंदी भाषा आणि साहित्याच्या माध्यमातून सर्जनशील अभिव्यक्तीला चालना देणे तसेच बौद्धिक संपदा हक्क आणि कॉपीराइट संरक्षणाविषयी जागरूकता निर्माण करण्याच्या उद्देशाने भारत सरकारच्या उद्योग संवर्धन व अंतर्गत व्यापार विभाग अंतर्गत कार्यालय महानियंत्रक (अभिकल्प व व्यापार चिन्ह) यांच्या वतीने या स्पर्धेचे आयोजन करण्यात आले होते. या स्पर्धेसाठी देशभरातून तब्बल ६७५ मौलिक हिंदी कविता प्राप्त झाल्या होत्या. त्यापैकी उत्कृष्ट १०० बालकवींच्या रचनांची निवड करून त्यांचा ‘अटल बाल हिंदी कविता संग्रह – २०२५’ मध्ये समावेश करण्यात आला. या मानाच्या यादीत विद्या प्रतिष्ठानच्या कु. अनुष्का कनेरकर आणि कु. रितिका धुमाळ यांनी स्थान मिळवत शाळेचा गौरव वाढविला आहे.

विद्यार्थिनींच्या या उल्लेखनीय यशामुळे शाळेच्या शिरपेचात आणखी एक मानाचा तुरा रोवला गेला आहे. शाळेच्या हिंदी विभागप्रमुख सौ. मंदा भोसले, सौ. शीतल धुमाळ आणि मुख्याध्यापिका श्रीमती सरिता शिंदे यांच्या मार्गदर्शनाखाली विद्यार्थिनींनी आपल्या सर्जनशील लेखनकौशल्याची उत्कृष्ट छाप पाडली आहे. विद्यार्थिनींच्या या यशाबद्दल विद्या प्रतिष्ठानचे उपाध्यक्ष ॲड. अशोक प्रभुणे, सचिव नीलिमा गुजर, खजिनदार युगेंद्र पवार यांनी आणि इतर मान्यवर सदस्यांनी त्यांचे मनःपूर्वक अभिनंदन केले असून, त्यांच्या भावी साहित्यिक वाटचालीसाठी शुभेच्छा दिल्या आहेत.

राष्ट्रीय स्तरावर मिळालेली ही गौरवाची संधी विद्यार्थिनींच्या लेखनप्रतिभेची साक्ष देणारी असून, त्यांच्या या यशामुळे इतर विद्यार्थ्यांनाही सर्जनशील लेखनाची प्रेरणा मिळणार आहे. विद्या प्रतिष्ठान अनंतराव पवार इंग्लिश मिडीयम स्कूलसाठी हा अभिमानाचा आणि आनंदाचा क्षण ठरला आहे.

आकाश पवार

divyajyotisamachar.in

The post विद्या प्रतिष्ठानच्या विद्यार्थिनींची राष्ट्रीय स्तरावर उत्तुंग भरारी; ‘अटल बाल हिंदी कविता संग्रहात’ दोन कवितांची निवड! appeared first on DIVYAJYOTI SAMACHAR.

पर्यटनाचा आनंद घेण्यासाठी महाबळेश्वर येथे गेलेल्या एका तरुणाला केवळ संशयावरून स्थानिक ग्रामस्थांनी लाकडी दांडके आणि काठ्यांनी बेदम मारहाण करून त्याची हत्या केल्याची खळबळजनक घटना घडली आहे. अक्षय रमेश जाधव (वय २५, रा. भिगवण, ता. इंदापूर) असे या मृत तरुणाचे नाव आहे. भोसे (ता. महाबळेश्वर) गावच्या हद्दीत ही दुर्दैवी घटना घडली असून, या प्रकरणी पाचगणी पोलिसांनी खुनाचा गुन्हा दाखल करून चार जणांना अटक केली आहे.

मिळालेल्या माहितीनुसार, भिगवण येथील अक्षय जाधव हा आपल्या मित्रांसोबत ८ जुलै रोजी महाबळेश्वर परिसरात फिरण्यासाठी आला होता. त्यांनी भोसे गावातील एका लॉजवर मुक्काम केला होता. रात्रीच्या वेळी अक्षय आपल्या खोलीतून बाहेर पडला असता, तो परिसरातील एका घरात डोकावून पाहत असल्याचा संशय काही स्थानिक नागरिकांना आला. या संशयावरून संतप्त झालेल्या काही जणांनी अक्षयला जाब विचारत लाकडी काठ्या, दांडके आणि लाथाबुक्क्यांनी बेदम मारहाण करण्यास सुरुवात केली. ही मारहाण इतकी अमानुष होती की अक्षय गंभीररीत्या जखमी झाला.

दरम्यान, लॉजच्या खोलीत अक्षय न दिसल्याने त्याच्या मित्रांनी परिसरात शोध सुरू केला. तेव्हा लॉजपासून काही अंतरावर अक्षय रक्ताच्या थारोळ्यात गंभीर अवस्थेत आढळून आला. मित्रांनी त्याला तातडीने पाचगणी व त्यानंतर वाई येथील शासकीय रुग्णालयात दाखल केले. मात्र, प्रकृती अधिक खालावल्याने त्याला बारामती येथील खासगी रुग्णालयात हलवण्यात आले. परंतु, तिथे पोहोचण्यापूर्वीच त्याचा मृत्यू झाला.

तरुणाच्या मृत्यूनंतर बारामती पोलिसांनी प्रारंभी ‘झिरो’ क्रमांकाने गुन्हा नोंदवून तो पाचगणी पोलिसांकडे वर्ग केला. पाचगणी पोलिसांनी घटनेचे गांभीर्य ओळखून तातडीने कारवाई करत चार मुख्य संशयितांना ताब्यात घेतले आहे. यामध्ये सूर्यकांत चंद्रकांत गोळे (रा. भोसे, महाबळेश्वर), अविनाश सतीश भोसले (रा. बावधन, वाई), राहुल जनार्दन राजपुरे (रा. कणूर, वाई) आणि अमोल गंगादेव वाडकर (रा. चिखली, वाई) यांचा समावेश आहे.

केवळ संशयावरून एका २५ वर्षीय तरुणाचा अमानुषपणे जीव घेतल्यामुळे परिसरात तीव्र संताप व्यक्त होत असून पाचगणी पोलीस या घटनेचा पुढील सखोल तपास करत आहेत.

आकाश पवार

divyajyotisamachar.in

The post महाबळेश्वरला पर्यटनासाठी गेलेल्या भिगवणच्या तरुणाची जमावाकडून हत्या; पाचगणी पोलिसांकडून चौघांना अटक appeared first on DIVYAJYOTI SAMACHAR.