भिगवण :
दिपावलीच्या पार्श्वभूमीवर भिगवण पोलिसांनी सतर्कतेचे उत्तम उदाहरण घालत सराईत चोरट्याला जेरबंद केले आहे. पुणे ग्रामीण पोलीस अधीक्षक संदीपसिंह गिल्ल यांच्या सूचनेनुसार करण्यात आलेल्या पेट्रोलिंग मोहिमेत पोलिसांनी तब्बल ₹१ लाख किमतीचा चोरीचा मुद्देमाल हस्तगत केला आहे.
दि. १६ ऑक्टोबर रोजी रात्री मौजे अकोले येथे पोलिस पथकाला एक संशयास्पद इसम मोटारसायकलवर आढळला. चौकशीत त्याचे नाव गणेश गंगाधर टिंगरे (वय ४४, रा. कर्जत, जि. अहिल्यानगर) असे समोर आले. त्याच्या ताब्यातील स्प्लेंडर मोटारसायकल (MH-23/BE-7395) चोरीची असल्याचे निष्पन्न झाल्याने गुन्हा दाखल करून ती जप्त करण्यात आली.
अधिक चौकशीत आरोपीने मदनवाडी येथून रिक्षा (MH-42/B-2783) चोरी केल्याची कबुली दिली. पोलिसांनी दोन्ही वाहनांसह एकूण ₹१ लाखांचा मुद्देमाल जप्त केला आहे. तपासात मोटारसायकल ही मिरजगाव (अहिल्यानगर) येथून चोरी झाल्याचे समोर आले.
ही यशस्वी कारवाई संदीपसिंह गिल्ल (पोलीस अधीक्षक, पुणे ग्रामीण), गणेश बिरादार (अपर पोलीस अधीक्षक, बारामती विभाग) आणि डॉ. सुदर्शन राठोड (उपविभागीय पोलीस अधिकारी, बारामती विभाग) यांच्या मार्गदर्शनाखाली सहा. पोलीस निरीक्षक विनोद महांगडे यांच्या नेतृत्वात करण्यात आली.
कारवाईत पोलीस अंमलदार महेश उगले, सचिन पवार, संतोष मखरे व शहाजी सुद्रीक यांनी मोलाची भूमिका बजावली.
गुन्ह्यांचा पुढील तपास पोलीस अंमलदार महेश उगले हे करीत आहेत.
