इंदापूर तालुक्यातील निरगुडे येथील जिल्हा परिषद प्राथमिक शाळेत एक अनोखा आणि प्रेरणादायी उपक्रम राबवण्यात आला. येथील विद्यार्थ्यांनी पारंपरिक पद्धतीने दिंडी सोहळा साजरा करत वारकरी सांप्रदायातील श्रद्धा, भक्ती आणि शिस्तीचे दर्शन घडवले.
विद्यार्थ्यांनी टाळ-मृदंगाच्या गजरात हरिपाठ, अभंग गायन, आणि भगव्या पताकांसह गावातून वारी काढली. शिक्षक, पालक आणि ग्रामस्थही या दिंडीत सहभागी झाले होते. वेशभूषा, भक्तीमय घोषवाक्ये सादरीकरणांनी वातावरण पवित्र झाले होते.
या उपक्रमामागील मुख्य उद्देश म्हणजे विद्यार्थ्यांमध्ये संस्कृतीचे जतन, समाजशीलता, सामूहिकतेचे भान, आणि आध्यात्मिक मूल्यांची जोपासना करणे हा होता. लहान वयातच वारकरी परंपरेचे मोल शाळेमार्फत शिकवणे ही संकल्पना विशेष कौतुकास्पद ठरली.
या वेळी गावचे सरपंच विनायक रणधीर, उपसरपंच देवेंद्र राऊत, शाळेचे मुख्याध्यापक औदुंबर दराडे तसेच शाळा व्यवस्थापन समितीचे अध्यक्ष अनिल खाडे, उपाध्यक्ष संदीप गायकवाड हे उपस्थिती होते. तसेच कार्यक्रमासाठी सरगुले मॅडम, होळकर मॅडम, काटकर मॅडम, राऊत सर, वनवे सर भुसे सर, मादळे सर तसेच शाळेचे मुख्याध्यापक औदुंबर दराडे यांनी विशेष प्रयत्न केले.
मुख्याध्यापकांनी विद्यार्थ्यांचा आणि शिक्षकवर्गाचा खास उल्लेख करून त्यांच्या मेहनतीबद्दल समाधान व्यक्त केले.स्थानिक ग्रामस्थांनीही शाळेच्या उपक्रमाला भरभरून प्रतिसाद दिला.
“अशा प्रकारच्या उपक्रमांमधून विद्यार्थ्यांमध्ये संस्कृतीबद्दल अभिमान निर्माण होतो. आजचा दिंडी सोहळा हा ग्रामीण शिक्षण व्यवस्थेच्या प्रगतीचे प्रतीक आहे.”
अनिल खाडे
अध्यक्ष शाळा व्यवस्थापन समिती
