भिगवण:-
पुणे-सोलापूर राष्ट्रीय महामार्गावर पंढरपूरला देवदर्शनासाठी जाणाऱ्या भाविकांवर सोमवारी पहाटेच्या सुमारास दौंड तालुक्यातील स्वामी चिंचोली येथे अमानुष दरोडा पडला. चहा पिण्यासाठी हॉटेलमध्ये थांबलेल्या महिलांना लुटण्याबरोबरच एका अल्पवयीन मुलीच्या गळ्याला कोयता लावून तिच्यावर अत्याचार केल्याची धक्कादायक घटना घडली आहे. या घटनेमुळे दौंड तालुक्यासह संपूर्ण जिल्ह्यात मोठी खळबळ उडाली आहे.
मिळालेल्या माहितीनुसार, सोमवार (दि.३०) पहाटे साडेचार वाजण्याच्या सुमारास चारचाकी गाडीतून पंढरपूर येथे निघालेले काही भाविक स्वामी चिंचोली येथील महामार्गालगतच्या एका हॉटेलमध्ये चहा पिण्यासाठी थांबले होते. याचवेळी दुचाकीवरून आलेल्या दोन अज्ञात इसमांनी अचानक हल्ला चढवला. त्यांनी भाविकांना कोयत्याचा धाक दाखवून त्यांनी महिलांच्या गळ्यातील दागिने हिसकावून घेतले. याहीपेक्षा धक्कादायक बाब म्हणजे, दरोडेखोरांपैकी एकाने त्यातील एका अल्पवयीन मुलीच्या गळ्याला कोयता लावून तिला काही अंतरावर फरफटत नेऊन तिच्यावर अत्याचार केला.या घटनेत एकूण दीड लाख रुपयांचा ऐवज लुटल्याचे समोर आले आहे.
या गंभीर घटनेमुळे संपूर्ण परिसरात भीतीचे वातावरण पसरले आहे. दौंड पोलीस ठाण्यात याप्रकरणी गुन्हा दाखल करण्यात आला असून, पोलीस अज्ञात संशयित आरोपींचा कसून शोध घेत आहेत. पंढरपूरकडे जाणाऱ्या भाविकांवर थेट महामार्गावरच अशा प्रकारे हल्ला झाल्याने नागरिकांमध्ये तीव्र संताप व्यक्त होत आहे. पोलिसांनी लवकरात लवकर आरोपींना अटक करून कठोर कारवाई करावी, अशी मागणी सर्व स्तरांतून होत आहे.
