सरपंचपद ‘सर्वसाधारण स्त्री’साठी राखीव ; पुरुष इच्छुकांची भ्रमनिराशा!
भिगवण:-
इंदापूर तालुक्यातील आगामी ग्रामपंचायत निवडणुकीसाठी आज झालेल्या सोडतीमध्ये भिगवणसाठी सरपंचपदाचे आरक्षण ‘सर्वसाधारण स्त्री’ प्रवर्गासाठी निश्चित झाल्यामुळे भिगवणच्या राजकीय आखाड्यात नवे ‘गुलाबी’ वादळ निर्माण झाले आहे. या अनपेक्षित निकालामुळे अनेक जुन्याजाणत्या नेत्यांना धक्का बसला असून, वर्षानुवर्षे सरपंचपदाची स्वप्ने पाहणाऱ्या अनेक पुरुष इच्छुकांचा सपशेल भ्रमनिरास झालेला आहे.
सरपंचपदासाठी मोठी आर्थिक व राजकीय तयारी करणाऱ्या पुरुषांच्या आशांवर एका क्षणात पाणी फेरले गेले आहे. येणाऱ्या पुढील काळामध्ये जिल्हा परिषद आणि पंचायत समितीच्याही निवडणूका होणार असल्यामुळे भविष्यामध्ये भिगवणच्या राजकारणात अनेक नवीन समीकरणेही उदयास येतील पण पक्षांतर्गत इच्छुकांमधील ‘तिढा’ सरपंचपदाच्या महिला उमेदवारीवरून कसा सुटतो आणि हे ‘गुलाबी वादळ’ नेमके कोणत्या दिशेने वळते का वळवते, हे पाहणे औत्सुक्याचे ठरणार आहे.
