भिगवण :
विद्या प्रतिष्ठान अनंतराव पवार इंग्लिश मिडीयम स्कूल चिंचोली मध्ये इयत्ता ४ थी ते १० वी च्या विद्यार्थ्यांसाठी ‘कॉस्मिक ॲस्ट्रॉनॉमी’ आणि ‘ॲस्ट्रोफिजिक्स’ या विषयावर एक विशेष करिअर मार्गदर्शन सत्र पार पडले. या सत्रात भारतीय अंतराळ संशोधन संस्थेचे (ISRO) ज्युनिअर सायंटिस्ट श्री. तेजस काळे आणि श्री. दिग्विजय सातपुते यांनी विद्यार्थ्यांना अत्यंत सोप्या भाषेत मार्गदर्शन केले.
शाळेच्या मुख्याध्यापिका सौ. सरीता शिंदे यांच्या मार्गदर्शनाखाली, शिक्षिका दीपा भोईटे आणि शाळेच्या माजी विद्यार्थी संघाने या संयुक्त कार्यक्रमाचे नियोजन केले होते.
या कार्यक्रमाचे मुख्य आकर्षण म्हणजे इस्रोचे ज्युनिअर सायंटिस्ट श्री. तेजस काळे यांनी स्वतः विकसित केलेले ‘रियूझेबल रॉकेट’ (पुन्हा वापरता येणारे रॉकेट). या रॉकेटमुळे अंतराळातील कचरा आणि प्रदूषण कसे कमी करता येऊ शकते, याबद्दल त्यांनी सविस्तर माहिती दिली. तसेच, कॉस्मिक ॲस्ट्रॉनॉमी क्षेत्रात भविष्यात करिअरच्या कोणकोणत्या संधी उपलब्ध आहेत आणि विद्यार्थी यामध्ये आपले भविष्य कसे घडू शकतात, याचा मार्ग दाखवला.
कार्यक्रमादरम्यान विद्यार्थ्यांनी अंतराळातील गमतीजमती, स्पेस मिशन, रॉकेटची कार्यपद्धती आणि अंतराळातील प्रदूषण यावर अनेक उत्सुकतापूर्ण प्रश्न विचारले. दोन्ही शास्त्रज्ञांनी विद्यार्थ्यांच्या शंकांचे अत्यंत रंजक पद्धतीने निरसन केले. या सत्रामुळे विद्यार्थ्यांमध्ये विज्ञान आणि अंतराळ संशोधनाविषयी मोठी गोडी निर्माण झाल्याचे मुख्याध्यापिका सरिता शिंदे यांनी सांगितले.
