भिगवण:-
आर्थिक परिस्थितीमुळे खाजगी शिकवणी लावता न येणाऱ्या दहावीच्या विद्यार्थ्यांसाठी रोटरी क्लब ऑफ भिगवणने एक अनोखी मदत केली आहे. क्लबच्या वतीने ‘आयडियल स्टडी’ नावाचे शैक्षणिक ॲप १७० विद्यार्थ्यांना मोफत वाटण्यात आले आहे. हा ॲप विद्यार्थ्यांच्या अभ्यासासाठी एक उपयुक्त साधन ठरणार आहे.
हा ॲप इंग्रजी, मराठी आणि हिंदी या तीन भाषांमध्ये उपलब्ध आहे. यामध्ये प्रत्येक प्रकरणाच्या नोट्स, प्रश्नपत्रिका आणि त्यांची उत्तरे दिली आहेत. तसेच, सरावासाठी चार चाचण्यांचे पेपर आणि त्यांची उत्तरे, सहामाही व वार्षिक परीक्षांच्या प्रश्नपत्रिका आणि गेल्या पंधरा वर्षांतील बोर्डाच्या प्रश्नपत्रिकांचाही यात समावेश आहे. यामुळे विद्यार्थ्यांच्या परीक्षेची तयारी अधिक सोयीची होणार आहे.
या ॲपचे वैशिष्ट्य म्हणजे, विद्यार्थी ते त्यांच्या पालकांच्या मोबाईलवर वापरू शकतात. त्यामुळे त्यांना स्वतःच्या मोबाईलची गरज नाही. विद्यार्थी घरी आल्यावर पालकांच्या मोबाईलवर या ॲपचा वापर करू शकतात, ज्यामुळे मोबाईलच्या गैरवापरालाही आळा बसेल. या ॲपमध्ये अभ्यासाला पूरक असे काही व्हिडिओ आणि ऑडिओ क्लिप्स देखील उपलब्ध आहेत.
हा कार्यक्रम भिगवण येथील सात शाळांमध्ये आयोजित करण्यात आला होता. याप्रसंगी रोटरी क्लब ऑफ भिगवणचे अध्यक्ष निखिल बोगावत तसेच सचिन बोगावत, कुलदीप ननवरे, संतोष सवाने, किरण रायसोनी, संपत बंडगर, संजय खाडे, प्रदीप वाकसे, बापूराव थोरात, महेश शेंडगे, विठ्ठल थोरात, डॉ. अमोल खानावरे, रणजित भोंगळे, प्रवीण वाघ आणि नानासाहेब बंडगर उपस्थित होते. रोटरी क्लबच्या या उपक्रमाचे सर्वत्र कौतुक होत आहे.
